Şaredarîya Rezanî çarçewaya Butçeya Beşdare Modelê Rezanî de Taxa Kaynartepe de derheqê prosesê awankerdişê projeyê Merkezê Ciwanîye de kombîyayîşê şarî yo verên organîze kerd.

Merkezê Ciwanîye 2025 de mîyanê projeyan de bî yewin ke şarê taxe bi pêşnîyazanê xo tesbît kerdî û bi rayanê xo rêz kerdî. Kombîyayîşo verên badê ronayîşê bingeyê merkezî ame organîzekerdiş ke prosesê awankerdişî şarî reyde pîya bêro plankerdiş.

Hemşaredara Şaredarîya Rezanî Leyla Ayaz, Hetkarê Hemşaredarî Jîyan Aslan û Reşat Yucel, endamê meclîsê şaredarî, temsîlkarê mudirîyanê eleqedaran ê şaredarî, zaf temsîlkarê rêxistinanê komelê sîvîlî, hemparê bînî û şarê taxe kombîyayîşî de ca girewt.

Kombîyayîşî de derheqê prosesê awankerdiş û waranê bikarardişê merkezî de mişewre bî. Hemwelatîyan pêşnîyazê xo pare kerdî ke merkez bibo warêkê cuye yo zaffonksîyon ke tede atolyeyê meslekmusnayîşî, çalakîyê kultur û hunerî û xizmetê şêwirmendîye pîya bêrê pêşkêşkerdiş.

Kombîyayîşî de ke problem û talebê rojaneyî yê taxe zî tede qisey bî, seba komîsyonanê taxe muracatê endamîye newe ra ameyî girewtiş ke prosesanê plankerdiş, tatbîqkerdiş û taqîbkerdişê projeyan de wezîfe gênê. Zaf hemwelatîyan muracat kerd ke beşdarê xebatanê komîsyonan bibê.

Hemwelatîyan hem derheqê projeyê Merkezê Ciwanîye de hem zî derheqê kombîyayîşî de memnûnîya xo îfade kerd ke beşdarîya înan a rasterast a prosesê tatbîqkerdişê qeraran temîn kena.

Bi Butçeya Beşdare Modelê Rezanî şar tena wayîrê qerarî ney, tatbîqkerdiş û kontrolkerdişê qeraran de zî rasterast wayîrê vatişî beno.

Şaristanê To, Butçeya To, Qerarê To!